Redacción |16 de decembro de 2020

Son nosos veciños o taboadés Dani Areán e o monfortino Álex Losada (Camba), e tamén son protagonistas no deporte mundial. Pouco máis alto se pode chegar na modalidade técnica que á final dun campionato mundial. Neste caso de Taekwondo e, nesta ocasión, on line. Están entre os oito mellores do mundo en cadansúa categoría, Júnior e Sénior. Un fito histórico para os deportistas da Ribeira Sacra e un logro memorable do Club Neka, con sede en Monforte, baixo a dirección do mestre José María Vega.

En tempos de coidar a saúde física e mental o deporte individual en competición segue a dar grandes satisfaccións na nosa terra e dende o rural. Máis aló do parón dos deportes máis populares en equipo con gran seguimento no noso territorio non se pode pasar por alto a alegría que estes días trouxeron os nosos veciños Dani Areán e Álex Losada ( Camba). E é que pouco máis alto se pode chegar na modalidade técnica que á final dun campionato mundial. Neste caso de TaekWondo e, nesta ocasión, on line. Participar nesta fase significa estar entre os oito mellores do mundo na súa categoría, Júnior e Sénior en cada caso. Un fito histórico para os deportistas da Ribeira Sacra.

Un logro memorable do Club Neka da localidade do Cabe que compensa o esforzo destes mozos baixo a dirección do mestre José María Vega.

Un total de 7 deportistas (Aitor Teijeiro, Lucía Roca, Carla Novo, Marco García, Arean, Camba e Laura Álvarez) loitaron dende o principio no mundial, pasando seis deles ás semifinais e dous ao máis alto.

O taboadés Dani Areán, agora xa número 8 do mundo, acadou este posto na categoría Júnior e foi o único europeo que logrou participar nunha disciplina con forte arraigo sobre todo no seu mundo de orixe, os países orientais. Areán mediuse dando a talla contra dous deportistas coreanos, dous estadounidenses de orixe asiática, dous tailandeses e o representante de China Taipéi.

Rivais similares os do monfortino, dende países con forte implantación desta disciplina , destacando o coreano actual campión do mundo. A promesa do Taekwondo de Lemos, á idade de 20 anos, competiu por streaming no encontro mundial no que finalmente se quedou con este oitavo posto ben grandioso.

O adestrador José María Vega celebra estes históricos resultados dos seus pupilos coa ilusión posta xa no vindeiro europeo, no que aposta por mellorar aínda os bos resultados da pasada tempada.