O xacemento que actualmente ocupa a varios arqueólogos/as na parroquia soberina de Proendos xa sacou á superficie algúns restos que anuncian a existencia de alomenos unha vivenda que constata un poboado romano e posiblemente construccións anteriores e posteriores de continuidade histórica. A escavación está financiada pola Consellería de Cultura e nesta segunda campaña tratará de vislumbrar novos trazos da historia na Ribeira Sacra con un mes de traballo e dez días en campo.
O xacemento de Proendos xa desvela varios tesouros en apenas
catro días despois do inicio da excavación. O equipo de arqueólogos deu a coñecer a existencia de, polo menos, un complexo
termal de extensión considerable, varios elementos de posible carácter público
e de servizos, posibles estruturas de habitación, unha probable trama urbana ou
estruturas funerarias, así como un hipotético sistema de condución de augas. Os
traballos tamén achegaron datos en relación tanto a fases anteriores á
ocupación romana, como un posible foso defensivo, quizais vinculable a
elementos castrexos, como posteriores, con posibles tumbas e elementos
funerarios medievais na contorna da Casa Reitoral de Proendos.
Isto é o que puido adiantar, polo momento, a consellería de
Cultura da Xunta, que financia esta segunda fase do proxecto que fora iniciado
polo Concello de Sober. As estruturas aprézanse polo momento a un nivel moi
superficial. A meirande parte do que asomaba no ano 2019 xa constataba o
establecemento das formas de vida de influencia do imperio romano nesta
localidade da Ribeira Sacra.
A actuación, que conta cun prazo de execución previsto de
dous meses e unha intervención de campo de dez días, consistirá na realización
dunha serie de sondaxes arqueolóxicas avaliativas naqueles puntos que teñen un
maior interese histórico-arqueolóxico, como son a zonas da posible existencia
dunha ábsida, dun pavimento/mosaico, de almacéns tipo hórreo e dun hipocausto.
Ademais da propia intervención arqueolóxica, tense previsto
levar a cabo diferentes accións de divulgación dos traballos arqueolóxicos
realizados.
